“Avek zanfan ou poze ler pou al dormi. Ou bezwen fer sir ou pare pour sa.” Premye konsey ki Marjorie Maimee ti donnen. I pe vey zanfan depi 2003, I dir sa bann letan I pa ti pe travay, I ti lanmenm kot lakaz e alors bann paran in komans anmenn zot zanfan kot li akoz zot pa ti pe ganny personn pour okipe e finalman in war li avek detrwa zanfan. Me vi ki I pe travay tousel pour le moman Marjorie pe vey zis 4 zanfan. I pran zanfan depi nesans ziska laz lakres.
Avan Marjorie I pran en zanfan dan son servis I demann paran pou anmenn li en zour avan pour gete si zot pou adapte ansanm. Ler paran in agree ki sa zanfan pou reste kot li I fer zot konn tou son kondisyon boner pou fer sir ki I annan mwens problem posib dan lefitir.
I en fe ki zanfan I bezwen ase keksoz pou gard zot okipe pandan lazournen, sa I pa zis en fason pou egey zot, me osi pou ed zot depans enpe sa kantite lenerzi ki zot annan e gard zot alert e an bonn sante. Vi ki landrwa kot I pe reste pankor vin pour li, Marjorie pa kapab fer bokou laranzman striktirel me in fer provizyon pou annan en pti balans anndan. Ler son fir I la zot kapab anmenn zanfan lo lans oubyen fer en pti pronmnad dan zalantour. Enfwa I ti anmenn zot lo playground e I rakonte ki serten pa ti oule retourn lakaz apre. Me kot lakaz menm I annan bokou zouzou ki zanfan I zwe avek tel ki lego, poupet, loto pou nonm enn de.
Marjorie I annan bon lantant avek son bann paran, I dir I pa zanmen en problem si I bezwen absante pour en zournen pour swa al kot dokter oubyen dan kek landrwa ofisyel; zis I fer sir I enform paran byen davans pour zot kapab prepare. I byen rar kisa I arrive selman, e otan ki I kapab I sey fer tou son keksoz dan Sanmdi.
Ler ou kot Marjorie ou war sa latasman ki I annan avek bann zanfan ki I veye, ou remarke ki zot vin parey son zanfan menm e zot atase avek li. Zot telman atase I dir ki parfwa ler paran I vin sers zot, zot plere zot oule reste avek li e ler in ariv ler pour zot al lekol I sagren e mank zot bokou. Toudmenm tanzantan zot pase pou get li, me dapre standar nasyonnal zot pa kapab pas lazournen alors zot zis pas avek paran epi ale.
Zanfan pa an danze kot Marjorie. Malgre ki I pa kapab modifye akoz sa landrwa pa pou li, in met baraz pou anpes zanfan al dan lakwizin ek deor e I ferm laport tou lasanm pou fer sir ki zot vir vir lanmenm otour salon kot I war zot.
Avek bann formasyon ki in ganyen avek IECD, Marjorie I dir ki in aprann ki manyer pou fer sir ki i pa ganny abize avek son bann kliyan. In osi aprofondi son konesans dan okip zanfan e pran plis prekosyon ki I pa ti neseserman pe fer avan akoz I pa ti konnen I enportan.“Zot donn bokou training, enn ler ler oun fatige en lasemenn I en pti pe difisil pou leve pou al formasyon Sanmdi selman sa kantite benefis ki oug annyen, sa kantite keksoz ki ouaprann I vo lapenn.”Marjorie I azoute ki “ler ou anrezistre avek IECD ou annan en landrwa pou anmenn ou problem devan, ou ganny proteskyon anba lalwa.” I dir ki sa lasistans finansyel ki bann Childminders I gannyen tou le mwan avek gouvernman gras a lentervansyon IECD I osi ed bokou.
Marjorie I ankouraz bann dimoun ki pe vey zanfan pou formaliz zot travay “sey fer en pti zefor an plis e vin devan, pa kasyet, vreman zot pou war bokou benefis.”
