Zis anfas lakot Baie St. Anne, Praslin, lekel ki ti pou mazinen ki la par lao semen i annan en servis vey zanfan. Me kot sa pti lakaz byen atiran penn an zonn Manmzel Sabrina Pointe i vey dis zanfan. Sabrina pe fer sa louvraz depi ki i ti fini pos segonder me apre enpe letan dekourazan 6an pase kot i tin aret, i ti finalman repran.
Apre ki i ti’n fer fini son letid, pe rod en louvraz, Sabrina ti pran de zanfan pour li okipe. Me kondisyon pa ti mars byen ek sa de paran alor i ti pran en travay anploye dan en laboutik.
« Letan sa laboutik ti fermen mon ti aret travay ankor. Mon papa ti ofer servis pou anmenn zanfan lekol e en paran ti apros mwan pour vey enn son zanfan. Mon ti pran sa enn apre sa lezot in vini, » Sabrina i rakonte.
Sabrina i vey dis zanfan aze ant 3 mwan e 4an, e parmi ti’n vin pour la premye fwa zour nou ti pe fer sa antretyen. Konpare ek lezot servis Chilmilding son bann zanfan pa ditou timid. Zot eksite letan zot ganny envite e zot pare pour montre bann nouvo keksoz ki zot in aprann.
« Vey zanfan i vin natirelman pour mwan, I fasil. Parfwa dimoun pour demann mwan ‘Ki manyer ou kapab avek tou sa manmary ?’ Me pour mwan i fasil, » Sabrina i dir nou an souriyan.
Menm si I travay kot lakour, Sabrina i leve byen gran maten, ver 5er pour prepar larive bann zanfan ki komans vini ver 6:45 bomaten. Apre zot gadyak Sabrina i donn zot bann diferan aktivite dapre zot laz.
“Malgre ki mon papa I annan transport I pa fasil pour anmenn tou zanfan bann aktivite an deor akoz sak group laz I annan son kapasite e I difisil pou vey zot. Toudmenm nou al lo lans parfwa,” I esplik nou.
Le fet ki I reste pros ek semen e menm tou bann diferan servis dan Baie St. Anne Sabrina i panse ki se sa ki atir bann paran kot li.
I dir nou ki ler I ti’n fer anrezistre I ti enpe enkyet lo fitir son biznes me apre I’n konpran son benefis.
“Letan nou’n komans ganny bann kour, mon vwar kot I benefisye mwan. Par egzanp mon kontan ki nou pe rikord tou keksoz akoz an ka en keksoz in arive ek zanfan nou annan laprev e ou ganny kouver,” I esplik nou.
Sabrina I osi remarke ki menm letan I pe donn bann zanfan aktivite pou fer I aprezan pran ankont ki laspe zot devlopman ki enkli.
Depi ki i’n konmanse, Sabrina Pointe in bezwen met tiles dan son lavarang e amelyor son lakwizin; sa in fer dan son pos me avek sa R10 mil roupi ki IECD in donnen in aste bann nouvo zouzou.
“I mon swe pour agrandi mon landrwa. Pou ofer bann zanfan en lespas pli gran pou pran zot goute e zwe,” i dir nou letan i mazin en kou lo son fitir plan.
Sabrina i rekonnet ki son metye pa fasil akoz I annan bokou depans e son reveni pa bokou. I menm bezwen ofer son asistan en pti larzan anplis malgre i ganny sa lasistans R5000 avek IECD. Me i pa vwar li pe fer en lot louvraz apard sa enn.
« Mon annan 34an e mon pa pe vwar mwan pe fer en lot louvraz. Menmsi la mon lev pli gran maten, mon napa bokou letan pour mon lekor me mon’n fini abitye. Mon kontan ki mon kapab donn zanfan sa swen ki preski parey sa ki kot lakour, » i dir nou avek en gran sourir ki reflekte plezir ki i annan pour son travay.
